35
O Iakov risailos ko Betel
O Del phendeas le Iakovoske:
— Uști, gia ko Betel, beș othe hai vazde othe ăk altari le Devleske, savo sikadilos tuke kana nașăsas katar keo phral o Esau!
O Iakov phendeas pe fameliake hai saorănghe kai sas lesa:
— Înkalaven le devlen străiino anda tumaro mașkar, kerdeon uje hai paruen tumare țoale! Ușten te gias ko Betel! Othe si te vazdav ăk altari le Devleske kai așundea man kana sas manghe pharo, hai sas manța katar phirdem.
On dine le Iakovos saoră devla străiino kai sas len hai ăl toarte kai sas len andăl kan. O Iakov prahosardea len tala o stejari kai si pașa o Sihem. Pala kodoia teleardes. E dar le Devleski ghelis andăl foruri pașal, kadea kă ni gheles pala ăl ciave le Iakovoske. O Iakov hai saoră manuș kai sas lesa aresles ko Luz, savo si o Betel, ando Them Kanaan. Vazdeas ăk altari othe hai ciuteas o anav kodole thaneske: O Del le Betelosko, kă othe sikadilos leske o Del, kana nașălas katar peo phral. E Debora, e doika le Rebekaki, mulis hai sas prahome mai tele katar o Betel, tala o stejari. Hai phende leske: O stejari le apseango. O Del sikadilos pale le Iakovoske, păce boldineailos anda o Padan-Aram, hai binekuvintisardea les. 10 O Del phendeas leske:
— Keo anav si Iakov, dar nai te mai bucios Iakov, hai keo anav si te avel Israel.
Hai kadea ciuteas lesko anav Israel. 11 O Del phendeas leske:
— Me sem o Del o Mai Zuralo. Te keres ciave hai te buteos! Ăk neamo hai mai but neamuri si te kerdeon anda tute, hai si te aves o dad thagarengo. 12 Tuke si te dav o them savo dinem les le Avraamoske hai le Isakoske. Si te dav kadav them ke ciavenghe pala tute.
13 O Del vazdineailos lestar, anda o than kai dinea leske duma. 14 O Iakov vazdeas ăk stîlpo animasko goghi ando than kai dineasas leske duma o Del, ăk stîlpo barăsko animasko goghi, hai c⁠iordeas mol hai untdelemno opral pă leste anda o Del. 15 O Iakov ciuteas anav le thaneske kai dinea leske duma o Del: Betel.
E Rahela merel
16 Pala kodoia telearde anda o Betel. Hai ni aresles ke Efrata, kana le Rahelake avile lake ăl dukha le kerimaske. Sas lan ăk kerimos pharo. 17 Ando timpo kana sas ăl dukha mai phare le kerimaske, e moașa phendea lake:
— Na dara, kă sa ciavo si!
18 Hai kana oi delas peo sufleto (kă mulis), ciuteas lesko anav Ben-Oni. Dar lesko dad phendea leske Beniamin.* O anav Ben-Oni hakeardeol „o ciavo mîră dukhengo”. O anav Beniamin hakeardeol „o ciavo kai si muro vast o ciacio” (savo si mai bahtalo, mai iubime hai mai zuralo). 19 E Rahela mulis hai sas prahome po drom karing e Efrata, savo si o Betleem. 20 O Iakov vazdeas ăk stîlpo animasko goghi pă lako than le prahomasko. I aghes buciol: O stîlpo poa than le prahomasko le Rahelako. 21 O Israel teleardeas hai kerdeas peo korto înkealtar katar e Migdal-Eder. 22 Kana o Israel beșelas ando than kadava, o Ruben ghelos hai sutos le Bilhasa, e roaba kai sas e romni leske dadeski. Hai o Israel așundeas.
Ăl ciave le Iakovoske
Le Iakovos sas les deșudui ciave. 23 Ăl ciave le Leeake: o Ruben, o ciavo o angluno le Iakovosko, o Simeon, o Levi, o Iuda, o Isahar hai o Zabulon. 24 Ăl ciave le Rahelake: O Iosif hai o Beniamin. 25 Ăl ciave le Bilhake, e roaba le Rahelaki: o Dan hai o Neftali. 26 Ăl ciave le Zilpake, e roaba le Leeaki: o Gado hai o Așer. Kadala sas ăl ciave le Iakovoske kai kerdineaile leske ando Padan-Aram.
O merimos le Isakosko
27 O Iakov areslos kă peo dad o Isak, ko Mamre, ko Kireat-Arba, kai si o Hebron, kai beșles sar străiini o Avraam hai o Isak. 28 Kadikita ghes sas le Isakos: ăk șăl hai ohtodeșa bărș. 29 O Isak dinea peo duho hai mulos hai nakhlos ando rîndo pe phurengo, phuro hai ciailo ghesendar. O Esau hai o Iakov, leske ciave, prahosarde les.

*35:18 O anav Ben-Oni hakeardeol „o ciavo mîră dukhengo”. O anav Beniamin hakeardeol „o ciavo kai si muro vast o ciacio” (savo si mai bahtalo, mai iubime hai mai zuralo).