17
O phanglimos mașkar o Del hai o Avraam
Kana le Avramos sas les îneadeșa hai înea bărș, o Rai sikadilos leske hai phendeas:
— Me sem o Del o Mai Zuralo, phir angla mande bi doșako! Hai si te kerav ăk phanglimos mașkar mande hai mașkar tute, hai si te butearav tut but mai but.
O Avram ciudea pes le mosa pe phuv.
O Del dea leske duma kadea:
Dikh muro phanglimos kai kerav les tusa: Si te aves o dad bute neamurengo. Nai te mai bucios Avram, hai si te bucios Avraam, kă kerdem tut te aves o dad bute neamurengo. Si te dav tut but ciave pala tute, si te kerav anda tute but neamuri, hai anda tute va înklena thagara. Si te înkearav muro phanglimos mașkar mande hai mașkar tute hai ke ciave kai aven pala tute, andăk neamo andă aver neamo. Kadava si te avel ăk phanglimos veșniko, kaște avav kiro Del hai ke ciavengo kai aven pala tute. Tuke hai ke ciavenghe pala tute si te dav o them kai beșes akanak sar străiino, saoră Them Kanaan te avel tumaro veșniko, hai me si te avav lengo Del.
Hai o Del mai phendeas le Avraamoske:
— Te înkeares muro phanglimos, tu hai ke ciave pala tute andăk neamo andă aver neamo! 10 Kadava si muro phanglimos kai te înkearen les mașkar mande hai tumende hai kire ciave kai aven pala tute: sea so si rig murșani mașkar tumende te aven cinde tele.* Cinde tele = cirkumcizime 11 Te aven cinde ando mas tele, hai kodova te avel o semno le phanglimasko mașkar mande hai tumende! 12 Ko phurimos le ohto ghesengo, o ciavo de rig murșani anda tumende te avel cindo tele andăk neamo andă aver neamo, i kă si robo biando ando kher, i kai si kindo lovența katar ăk străiino kai nai anda kiro neamo! 13 Si musai te avel cindo tele kadikita o robo biando ando kher, kabor kova kindo pă lovende. Hai kadea muro phanglimos te avel zureardo andă tumaro mas, sar ăk phanglimos veșniko. 14 Ăk murș kai nai cindo ando mas tele te avel dureardo anda o mașkar pe neamosko! Ușteadeas muro phanglimos.
15 O Del phendeas le Avraamoske:
— Te na mai hakeares ke romnea Sarai, kă lako anav si te avel Sara! 16 Me si te binekuvintiv lan, si te dav tut ăk ciavo anda late, hai si te binekuvintiv lan, hai oi si te avel e dei bute neamurenghi. I thagara poporenghe si te înklen anda late.
17 O Avraam ciudea pes le mosa ke phuv, hai asaia andă peo ilo hai phendeas:
— Te mai biandol ăk ciavo manușăske ăk șălako bărș? Mai daștil te bianel e Sara kăl îneadeșa bărș?
18 Hai phendeas le Devleske:
— Te giuvindil o Ismael angla tute!
19 O Del phendea leske:
— Ciacimasa ki romni e Sara si te bianel tuke ăk ciavo hai si te cius lesko anav Isak. Me si te înkearav muro phanglimos lesa sar ăk phanglimos veșniko, andă leske ciave pala leste. 20 I anda o Ismael așundem tut, binekuvintiv les, si te kerav te avel les but ciave, si te butearav les but mai but. Si te avel o dad deșuduiengo thagara. Si te avel ăk neamo baro. 21 Dar muro phanglimos si te înkearav les le Isakosa, savo si te bianel les e Sara gi bărșă ke vremea kadaia.
22 Pala so dineas duma lesa, o Del vazdineailos katar o Avraam. 23 O Avraam lileas pe ciaves le Ismaelos, hai saorăn kai biandile andă lesko kher hai saoră robi kai sas kinde pă lovende, sea so sas murș ando kher le Avraamosko, hai andă kodova ghes cindea len andă lengo mas tele, kadea sar poruncisardea leske o Del. 24 Le Avraamos sas les îneadeșa hai înea bărș kana sas cindo andă piro mas tele. 25 Hai leske ciaves le Ismaelos sas les deșutrin bărș kana sas cindo andă piro mas tele. 26 O Avraam hai peo ciavo o Ismael sas cinde tele kear ando ghes kodova. 27 Hai saoră manușa anda lesko kher, robi biande andă lesko kher sau kinde pă lovende katar ăl străiinea, on sas cinde tele andăk than lesa.

*17:10 Cinde tele = cirkumcizime