36
O Bețaleel, o Oholiab hai saoră manuș kai hakeardeon, saven o Rai kerdea len gogheasa hai hakearimasa te gianen sar te keren o than o sfînto, trăbul te keren sea pala sar poruncisardeasas o Rai.
O poporo anel daruri anda o korto
O Moisea dineas mui le Bețaleelos, le Oholiabos hai saoră manuș kai hakeardeon, saven o Rai kerdea len gogheasa, sea kola kai țîrde len o ilo, te aven hai te keren e buki. Liles katar o Moisea saoră daruri save andinesas len ăl israelițea te keren o than o sfînto. Hai o poporo sa mai anenas lenghe daruri, andă fiosavi deteherin. Atunci saoră manuș kai hakeardeonas, save kerenas saoră bukea ko than o sfînto, fiosavo katar pi buki, aviles hai phendes le Moiseaske:
— O poporo sa mai anel but mai but dă kabor trăbul te keras ăl bukea kai poruncisardeas o Rai.
O Moisea ciuteas te den mui and-e tabăra:
— Koniva, kă si murș, kă si giuvli, ta na mai keren daruri anda o than o sfînto!
Kadea oprisardeas le poporos te mai anen daruri. Areslos o materialo anda saoră bukea, hai i mai acilos.