6
Iefta manuș si alome te ajutin le apostolen
1 Andăl ghesa kodola, kana o număro le ucenicengo bareolas but, kola save denas duma grecisko rovenas pes kontra kolavrenghi, kai denas duma evreisko, kă lenghe phivleanghe ni delas pes andă fiosavo ghes lenghi rig le ajutoreski. 2 Atunci ăl deșudui kides saoră ucenicen hai phendes:
— Nai mișto ka ame te mukas o kuvînto le Devlesko kaște slujis kăl sini. 3 Anda kodoia, phralale hai pheiale, alon mașkar tumende iefta murș, dine duma dă mișto, pherde Duho Sfînto hai goghi, saven va ciasa len ande slujba kadaia. 4 Hai ame va beșasa mai but ande rugăciunea hai ande slujirea le Kuvîntoski.
5 Kadal vorbe placiuias saoră adunarea. Alosardes le Ștefanos, manuș pherdo pakeamos hai Duho Sfînto, le Filipos, le Prohoros, le Nikanoros, le Timonos, le Parmenasos hai le Nikolaes, ăk manuș andai Antiohia savo nakhlos kăl evreea. 6 Kadalen ande len angla ăl apostolea. Păce rughisailes, ciutes pe vast pă lende.
7 Hai o kuvînto le Devlesko răspîndilas pes sa mai but, hai o număro le ucenicengo anda o Ierusalimo bareolas but mai but. Kear i but rașaia pakeaies hai așundes katar kadav mesaj.
O Ștefano si akuzome
8 O Ștefano sas binekuvintime katar o Del, savo dinea les zuralimos te kerel minuni hai semnea bare ando mașkar le manușăngo. 9 Dar niște manuș andai sinagoga savi buciol e Sinagoga le Hastramenghi andai Robia, le Ciriniaenghi hai le Alexandrienghi, andăk than avre manușănța andai Ciliciia hai e Asia, începosailes te han pes le Ștefanosa, 10 dar ni daștinas te beșen kontra leski, kă o Duho ajutilas les te del duma gogheasa. 11 Kadea kă pokindes cioreal niște manușăn te phenen:
— Așundeam les sar phenelas bukea nasul kontra le Moiseaski hai kontra le Devleski.
12 Kadea ațîțosardes le manușăn, le phuren hai le sikaiitoren le Krisake. Aviles, ciutes o vast pă leste hai înghearde les anglai kris. 13 Andines niște martorea hohamne save phendes:
— O manuș kadava totdeauna del duma kontra le Temploski sfînto hai kontra le Krisaki le Moiseaski. 14 Kă așundeam les phenindos kă kadav Isus anda o Nazareto va peravela kadav Templo hai va sikavela le manușăn aver obiceia dă sar kola save dinea len amenghe o Moise.
15 Sea kai sas ande kris dikhles orta po Ștefano, hai dikhles kă lesko mui dikheolas sar ăk mui îngerosko.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.