🏠 <     Alfabeto rromano o internacionalo     Alfabeto le literasa „k”
E buchi le Ioanoschi Bolitori
3
1 Sas o bărș le deșupangengo
dă cana sas o baro thagar o Tiberiu,
hai o Ponțiu Pilat sas guvernatori ande Iudeea,
o Irod sas o thagar ande Galileea,
o Filip,
lesco phral,
sas thagar ande Ituria hai ando ținuto le Trahonitiosco
hai o Lisania sas thagar ande Abilenea.
2 Ăl bare rașaia sas o Ana hai o Caiafa.
Ando bărș codova o cuvînto le Devlesco
dineas duma le Ioanosche le Zahariosco ande mulani.
3 Hai o Ioan ghelos andă saoro ținuto le Iordanosco
hai phenelas le manușănghe te bolden pes
caște sicaven că mucles o bezeh hai boldineailes caring o Del,
ca lenghe bezeha te aven iertime.
4 Andal buchea cadala si ramome
ando lil le vorbengo le proorocosco Isaia:
„Daconiva del mui ande mulani:
«Laciaren o drom pă savo avel o Rai,
orton lesche poteci!
5 Saoră harea va avena astupome,
hai saoră munți hai saoră plaia va avena perade.
Ăl droma banghe va avena ortome,
hai ăl droma phaghe va avena laciarde.
6 Hai saoră manuș va dichena o hastramos le Devlesco.» ”a
7 Cadea că o Ioan phenelas le bute manușănghe
cai avenas leste te bolel len:
— Puia sapenghe,
con phendea tumenghe te nașăn catar e pedeapsa cai avel?
8 Cadea că train caște sicaven că muclen o bezeh
hai boldineailen co Del!
Hai na începon te phenen andă tumende:
„Amaro dad si o Avraam!”
Că phenav tumenghe
că o Del daștil te cherel ciave le Avraamosche andal bar cadala.
9 O tover si deja ciutino che rădăcina le pomenghi.
Cadea că orso pomo cai ni cherel rodo lacio
va avela cindo hai ciudino ande iag.
10 Ăl but manuș pucenas les:
— Atunci so trăbul te cheras?
11 Ov dinea len anglal:
— Coles cai si les dui gada,
te hulael colesa cai nai les,
hai coles cai si les hamos,
sa cadea te cherel!
12 Aviles i niște vameșea te aven bolde
hai phende lesche:
— Sicaiitorina,
ame so te cheras?
13 Ov phendea lenghe:
— Na manghen mai but dă cabor poruncisailos tumenghe!
14 Niște soldațea pucenas les i on:
— Dar ame so trăbul te cheras?
Ov phendea lenghe:
— Na len canicastar love silasa,
nici na cheren canicas doșalo biciacimasco!
Hai te aresel tumen tumaro pochinimos!
15 O poporo ajuchearelas hai cu sea pucenas pes andă pe ile cana
o Ioan nai cumva o Cristos.
16 O Ioan dineas anglal saorăn:
— Cabor anda mande,
me bolav tumen paiesa.
Dar avel codova cai si mai zuralo dă sar mande,
savesche ni meritiv te putrav e haravli lesche poghimaschi.
Ov va bolela tumen Duhosa Sfînto hai iagasa.
17 Ov va avela le lopatasa ando vast
caște del rigate e pleava anda o ghiv.
Va chidela o ghiv andă peo hambari,
hai e pleava va phabarela lan ande iag
cai ni daștil te avel mudardi.
18 Cadea hai bute avre vorbența
o Ioan rughisardea len te parubdeon
hai phendeas le poporosche e vestea e lacii.
19 Dar o Irod o thagar sas mustrome catar o Ioan
anda leschi relația le Irodiadasa,
e romni lesche phraleschi,
hai anda saoră buchea nasul cai cherdeasas len.
20 Ov că sea cadala mai ciuteas iech:
phandadeas le Ioanos ande temnița.
O Del phenel că o Isus si lesco Ciavo
21 Mai anglal,
cana sas boldo saoro poporo,
sas boldo i o Isus.
Hai cana rughilas pes,
putardilos o ceri
22 hai o Duho Sfînto muclea pes pă leste sar ăc porumbelo.
Hai anda o ceri așundilos ăc glaso cai phenelas:
— Tu san muro Ciavo iubime.
Andă tute arachav bari plăcerea!
Con si o dad le Isusosco?
23 Le Isusos sas les cam treanda bărș cana începosardeas pi buchi.
Ăl manuș pacheaies că sas o ciavo le Iosifosco,
savo sas o ciavo le Eliosco,
24 savo sas o ciavo le Matatosco,
savo sas o ciavo le Levesco,
savo sas o ciavo le Melhiosco,
savo sas o ciavo le Ianainosco,
savo sas o ciavo le Iosifosco,
25 savo sas o ciavo le Matatiasco,
savo sas o ciavo le Amososco,
savo sas o ciavo le Naumosco,
savo sas o ciavo le Eslisco,
savo sas o ciavo le Nagaisco,
26 savo sas o ciavo le Maatosco,
savo sas o ciavo le Matatiasco,
savo sas o ciavo le Semeisco,
savo sas o ciavo le Iosehosco,
savo sas o ciavo le Iodasco,
27 savo sas o ciavo le Ioananosco,
savo sas o ciavo le Resasco,
savo sas o ciavo le Zorobabelosco,
savo sas o ciavo le Salatielosco,
savo sas o ciavo le Nerisco,
28 savo sas o ciavo le Melhisco,
savo sas o ciavo le Adisco,
savo sas o ciavo le Cosamosco,
savo sas o ciavo le Elmadamosco,
savo sas o ciavo le Erosco,
29 savo sas o ciavo le Isusosco,
savo sas o ciavo le Eliezerosco,
savo sas o ciavo le Iorimosco,
savo sas o ciavo le Matatosco,
savo sas o ciavo le Levisco,
30 savo sas o ciavo le Simeonosco,
savo sas o ciavo le Iudasco,
savo sas o ciavo le Iosifosco,
savo sas o ciavo le Ionamosco,
savo sas o ciavo le Eliachimosco,
31 savo sas o ciavo le Meleasco,
savo sas o ciavo le Menasco,
savo sas o ciavo le Matatasco,
savo sas o ciavo le Natanosco,
savo sas o ciavo le Davidosco,
32 savo sas o ciavo le Iesesco,
savo sas o ciavo le Iobedosco,
savo sas o ciavo le Boazosco,
savo sas o ciavo le Salmonosco,
savo sas o ciavo le Naasonosco,
33 savo sas o ciavo le Aminadabosco,
savo sas o ciavo le Adminosco,
savo sas o ciavo le Arnisco,
savo sas o ciavo le Esromosco,
savo sas o ciavo le Faresosco,
savo sas o ciavo le Iudasco,
34 savo sas o ciavo le Iacovosco,
savo sas o ciavo le Isacosco,
savo sas o ciavo le Avraamosco,
savo sas o ciavo le Tarasco,
savo sas o ciavo le Nahorosco,
35 savo sas o ciavo le Seruhosco,
savo sas o ciavo le Ragausco,
savo sas o ciavo le Falecosco,
savo sas o ciavo le Eberosco,
savo sas o ciavo le Salasco,
36 savo sas o ciavo le Cainamosco,
savo sas o ciavo le Arfaxadosco,
savo sas o ciavo le Semosco,
savo sas o ciavo le Noesco,
savo sas o ciavo le Lamehosco,
37 savo sas o ciavo le Matusalasco,
savo sas o ciavo le Enohosco,
savo sas o ciavo le Iaredosco,
savo sas o ciavo le Maleleelosco,
savo sas o ciavo le Cainanosco,
38 savo sas o ciavo le Enososco,
savo sas o ciavo le Setosco,
savo sas o ciavo le Adamosco,
savo sas o ciavo le Devlesco.