🏠 <     Alfabeto le literasa „c”     Alfabeto rromano o internacionalo
O lil karing ăl galateni
O saluto le Pavelosko
1
1 O Pavelo kerdo apostolo,
na katar ăl manuș,
hai nici ni sikadeas man dak manuș,
numa o Isus Kristos,
hai o Del o Dad,
kai vazdeas les anda ăl mule,
2 hai saoră phral kai si manța:
karing ăl khangherea andai Galația.
3 O miștimos hai e pacea tumenghe
katar o Del amaro Dad
hai katar o Rai o Isus Kristos!
4 Ov dineas pes anda amare bezeha
te hastravel amen
anda kala nasul giungale bărșa,
sar kamnos o Del amaro Dad.
5 Leske si o barimos
akanak hai orkana.
Amin.
Nai aver evanghelia
6 Miriv man kabor dă sigo
dureon katar Kova kai dineas tumen mui
ando miștimos le Kristososko
kă aver evanghelia
7 kai nai ciacii.
Numa kă si manuș kai rimon tumen
hai kamen te paruen e evanghelia le Kristososki.
8 Dar kana ame sau ăk îngero anda o ceri
te avela te phenel tumenghe aver evanghelia
de sar kai ame phendeam lan,
te avel dino armaia pentru totdeauna.a
9 Sar phendeam mai anglal,
pale phenav akanak:
„Kana dakoniva phenela tumenghe aver evanghelia
kai ni avela sar koia kai lilen lan,
te avel dino armaia pentru totdeauna.”
O Pavelo sas kerdo apostolo katar o Kristos
10 Akanak kamav
ka ăl manuș te phenen dă mișto anda mande
sau o Del?
Sau rodav me te placiov le manușăn?
Kana mai rodava te placiov le manușăn,
ni mai sem o robo le Kristososko.
11 Phralale hai pheiale,
kamav te gianen kă e evanghelia
kai me dav la duma,
nai katar ăl manuș,
12 kă ni lilem lan
hai nici ni sikilem lan manușăstar,
dar sikadilos manghe o Isus Kristos.
13 Kă așunden so keravas me mai anglal,
kana pakeavas ande religia le iudeienghi.
Sar keravas baro nasulimos
hai phandavas le khangherea le Devleski
te stîrpiv lan.
14 Bareovas ande religiia le iudeienghi
mai but de sar kola kai sas manța
andăl bărșa
hai ando muro neamo.
Hai kamnem te ciav saoră ilo
te kerav ăl obiceia mîră phurenghe.
15 Dar o Del ciutea man rigate
dă kana semas ando păr mîră dako,
hai dinea man mui andă peo miștimos,
16 pentrukă
ov kamnos te sikavel manghe pe Ciaves,
me te phenav avre neamurenghe anda leste.
Atunci ni beșlem
te dav duma nici ăk manușăsa,
17 nici ni ghelem ando Ierusalimo
kolende kai sas apostolea mai anglal mandar.
Sigo teleardem ande Arabia,
hai boldineailem palpale ando Damasko.
18 Pala trin bărș uștilem ando Ierusalimo
te pringianav le Kifas
b hai acilem leste deșupangi ghes.
19 Dar ni dikhlem nici iekhes
andal kolaver apostolea,
numa le Iakovos, o phral le Raiesko.
20 Andă so ramov tumenghe,
dikh,
angla o Del,
ni hohavav.
21 Pala kodoia ghelem andăl Thema le Siriake hai le Ciliceake.
22 Dar ăl khangherea le Kristososke
kai si ande Iudeia
înkă ni dikhlesas man.
23 On numa așundes:
„O manuș kai phandelas amen
hai kerelas amenghe nasul,
akanak del duma anda o pakeamos,
kai mai anglal kamelas te stîrpil les.”
24 Hai on barearenas le Devles
anda mîrî kauza.