O salmo 50
Sea so si p-e phuv, si le Devlesko
(Ăk ghili le Asafoski)
1 O Del le devlengo,
o Rai,
del duma
hai del mui e phuv dă katar înklel o kham gi karing perel o kham.
2 Anda o Siono,
o mai șukar than,
strălucil o Del.
3 Amaro Del avel hai ni aciol dă lok:
angla leste si ăk iag kai phabarel,
hai ăk braval bari avel lesa.
4 Del mui o ceri opral
hai e phuv kaște krisol pe poporos:
5 „Kiden kolen savenghi mila aciol karing mande,
save kerdes phanglimos manța jertfasa hai siniasa sfînto!”
6 O ceri phenel lesko ciacimos,
kă o Del,
ov si o krisitori.
\qs Pauza andai muzika
7 „Așun,
muro poporo,
hai si te dav duma!
Israel,
si te avav martori ki kontra!
Me sem o Del,
o Del kiro.
8 Na anda ke jertfe hai sini sfînto hav man tusa,
ke phabarimata dă sea si angla mande întotdeauna.
9 Nai te lav guruva katar keo kher,
nici țapi anda ki bar.
10 Kă mîră si saoră animalea vășenghe,
hai saoră animalea khereske păk mia plaia.
11 Pringianav saoră ciriklea pal plaia,
hai so mișkil po kîmpo si muro.
12 Te sas manghe bokh,
ni phenavas tuke,
kă mîrî si e lumea hai sea so si andă la.
13 Ciaces hav mas taurengo?
Sau peav rat țapengo?
14 An sinia sfînto naiimaske le Devleske
hai pokin ke armaia kerde le Mai Bareske!
15 De man mui ando ghes ke nekazosko,
hai me va hastravava tut,
hai tu va cinstisa man!”
16 O Del phenel koleske kai kerel nasul:
„Sar daștis te phenes mîră krisimata,
hai des duma anda muro phanglimos,
17 kana uros o mustromos
hai ciudes mîră vorbe pala tute?
18 Kana dikhes ăk cior,
placiol tut lestar,
hai san amal kolența save soven giuvleanța kai nai lenghe.
19 Des o drom le mosko ko nasul,
hai o hohaiimos beșel pă ki cib.
20 Beșes tele hai des duma pă keo phral,
arakhindos doș ando ciavo ke dako.
21 Kerdean kadaia,
hai me acilem.
Hai gîndisailean kă me sem kadea sar tute.
Dar si te hav man tusa
hai si te kerav tut doșalo.
22 Len seama katar ăl bukea kadala,
tume kai bistren le Devles,
kaște na hărtăniv tumen hai ta na avel koniva te hastravel tumen.
23 Kon anel ăk sinia sfînto naiimaski,
kodova cinstil man,
kova kai kerel ăk drom orta,
kodoleske si te sikavav leske sar hastravel o Del.”a
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)