Lé Ábrahámosz hin lész té ávérá csávé, de lé Izsákoszké mikél o bárvájibo
25
1 The o Ábrahám lijász pészké jékhá rromnyá,
szávi kide bicsijász Keturá.
2 Voj kérgyász lészké lé Zimránosz,
lé Joksánosz,
lé Médánosz,
lé Midiánosz,
lé Isbákosz the lé Suáhhosz.
3 O Joksán kérgyász lé Sébász the lé Dédánosz.
Kátho Dédán ávilé kálá népi:
o asuri,
o letusi the o leummi.
4 Lé Midiánoszkré csávé hász o Éfá,
o Éfer,
o Hhánok,
o Abida the o Eldá.
Kálá sze lá Keturákré csávé hászlé.
5 Lé Ábrahámosz szo hász lész,
szemindenosz lé Izsákoszké dinyász.
6 O kolávrén csávén,
szávé káthá ávér rromnyá kérgyilé,
o Ábrahám dinyá lén ajándéki.
The dzsi káj dzsidzsijász vo,
trányá lén káthá pészkro csávo,
kátho Izsák,
ká kodo thán káthár opré ávél o khám,
ko thém Kedem.
Lé Ábrahámoszkro méribo
7 O Ábrahám but dzsidzsijász,
jég săl the éftávárdés the páncs bors.
8 O Ábrahám ári dinyász pészkro vogyi
the mujász pálá jég sukár phuribo,
phuro án borsá the cselo viácátár.
The othé riszjász máská pészkré mulé.
9 O Izsák the o Ismáel,
lészkré csávé,
párrundé lész án barlangosz Makpéla,
szávo ánglo Mamre hino,
pé lé Efronoszkri mál,
szávo lé Cohhárészkro csávo hászlo,
jég hhétitánosz.
10 Kede hinyi i mál
szávi cingyász lá o Ábrahám kátho hhétitenye.
Othé hász párrundé o Ábrahám the lészkri rromnyi i Sárá.
11 The pálá szoszté mujász o Ábrahám,
o Dél áldingyász lészkré csász lé Izsákosz.
Vo pásá i hhányik Láhháj-Roj bésjász.